A Escola Provincial de Danza celebra o Festival Fin de Curso no auditorio do Conservatorio de Música de Ourense o venres 17 de xuño ás 20.00hrs. Con esta actuación na que participarán os diferentes grupos da Escola (uns cen artistas de todas as idades realizarán un espectáculo de música, canto e baile tradicional), péchase a actividade lectiva do curso 2021-2022, ano no que pouco a pouco se volveu á normalidade despois de dous anos condicionados pola pandemia da Covid-19, e nos que a actividade artística se reduciu a unhas cantas actuacións en Bande, en Armamar (Portugal), en Requeixo de Grou-Lobios, e na cidade de Ourense.
Rematado o curso, a actividade da Escola de Danza-Castro Floxo continuará durante os meses de verán, con diferentes actuacións pola provincia (C. Caldelas, Bande, Monterrei, Allariz...) e festivais de folclore de Portugal.
